دعاء وزهرة

حكايتك

دعاء وزهرة
دعاء وزهرة
وأنا 13 سنة كنت بستني يوم الجمعة من كل إسبوع عشان بنتجمع كلنا في بيت جدي، أنا وولاد عمامي، بصراحة كنت بستني زهرة بنت عمي أكتر واحدة عشان كانت أقرب واحدة ليا، هي زميلتي في المدرسة و بتحب الرسم زيي و كمان قريبتي.كل جمعة بنروح نقعد نوّري بعض رسوماتنا اللي رسمناها في حصص الرسم و نرسم بعض عشان نعلقها في البيت عندنا، بس زهرة و عيلتها فضلوا إسبوعين مش بييجوا عند جدي ولا بشوفها في المدرسة و أنا قلقت عليها أوي, روحت سألت مامتي و ردت عليا إجابة غير متوقعة خالص بنسبالي، قالتلي إنهم مشغولين بيحضروا لفرح زهرة.بعدها بأيام بابا قالي إن انا كمان في عريس متقدملي و هو وافق عليه و إن مفيش مدرسة تاني و لما إعترضت قطعلي كل رسوماتي و قالي إني فاشلة و مكاني البيت.
و في آخر يوم ليا في المدرسة رسمت رسمة لمدرستي و شكرتها علي تعبها معايا و حكتلها اللي حصل معايا أنا و زهرة وإن بابايا قالي إن البنت مكانها البيت و إني فاشلة بس هي وعدتني إنها هتروحله و تقوله إننا نستحق نكمل تعليم و رسم كمان. أنا إتعلقت في الأمل ده أوي. فضلت أرسم طول الوقت و أعلق رسوماتي علي الحيط عشان بابا يشوفها و يغير رأيه.
و في يوم بابا جاله جواب من المدرسة إنه ييجي يسحب ورقي و راح و المفاجأة كانت إن مُدرستي علقت رسوماتي أنا و زهرة في الفصل و إتكلمت معاه وقالتله إن إحنا موهوبين بالنسبه لسننا ،و نستاهل فرصة. وعدته كمان إنها هتجبلنا شغل أول مانتخرج عشان تطمنه إن مجهوده مش هيروح،
بابا رجع اليوم ده و قالي إنه ماسحبش الورق و هو هيفضل يدعمني لحد ما أوصل لحلمي و إني موهوبة و استاهل فرصة ، بابا إكلم مع عمي عشان زهرة كمان.
و دلوقتي وصلنا لحلمنا لأننا إتمسكنا بتعليمنا و حولنا هوايتنا لشغلنا
دعاء خليل وبنت عمي زهرة خليل, فنانتان مصريتان عالميتان.