مروة حسن

حكايتك

مروة حسن
مروة حسن
اسمي مروة حسن.. من أسوان.. بدرس زي معظم البنات.. وببيع مناديل، مش زي معظم البنات.. أي حاجة عشان أساعد عيلتي.
مرّة كنت ببيع مناديل كالعادة، ولقيت ناس كتير بتجري في الشارع.. مفهمتش في ايه.. ولا سألت ليه.. بس حسيت اني عايزة ألعب.. وقررت أجري معاهم.. قولت المناديل تقدر تستنّى شوية..
جريت وجريت.. لحد ما وصلت معاهم للنقطة اللي كلهم وقفوا فيها.. فجأة لقيتهم بيتلموا عليا ويهنوني.. مكونتش فاهمة على ايه، ومبسوطين بيا وبيصوروني.. مفهمتش ايه اللي بيحصل وكل اللي عملته اني بس جريت.
اكتشفت ان ده كان سباق، بتاع مجدي يعقوب للقلب في أسوان.. بيقولوا عليه "ماراثون"، وان أنا كسبته.. طلعت الأولى فيه.. ومن هنا جه اسم: "فتاة أسوان الأولى".
 
مروة حسن – بنت من أسوان.