نهلة

أنا نهلة من المنوفية، 13 سنة. بحب أغني أوي و دايماً فاتحة الراديو و أنا بذاكر. إخواتي كانوا دايماً بيستغربوا إزاي بعرف أركز و الأغاني شغالة جنبي.
وأنا بالنسبالي كانت أحلي طريقة مذاكرة، بس عشان مايزعلوش كنت بوطي صوت الراديو و كمان بوطي صوتي و أنا بغني، او استني البيت ينام و أغني بصوت عالي.
بابا الوحيد اللي كان بيسمعني عشان بيبقي راجع من الشغل، كان بيشجعني و يقولي صوتك حلو كملي، كان مقتنع بصوتي لدرجة إنه راح المدرسة عندي و طلب إني أشترك في حفلات المدرسة. والمدرسة وافقت، و إختاروني أغني في حفلة آخر السنة، أنا تحمست أوي و وعدت بابا إني هبقي قدها، إشتغلت علي صوتي أوي في التدريبات و خدت كل تركيزي.
و جه يوم الحفلة و غنيت من قلبي لكل الناس و أولهم بابا و ماما، الناس سقفتلي جامد، أهلي كانوا فرحانيين بيا أوي يوميها،
بس بعدها بيومين فرحتهم راحت عشان نتيجتي طلعت و سقط في مادتين، كانت صدمة كبيرة أوي ليا، وماما منعتني من الغنا تماماً. بس بابايا
قعد معايا وقالي لازم تحافظي علي مستواكي الدراسي و تطوري لغتك عشان تعرفي تحققي أحلامك وتتعلمي نطق الكلمات صح عشان تقدري تدخلي معهد الموسيقي و تتفوقي ،وعدت بابا إني هركز في دراستي عشان أحقق احلامي و أنا دلوقتي بركز أوي في مذكرتي و منعت الغنا في البيت طول فترة الدراسة عشان خاطر ماما.
ولما أخلص دراستي أكيد هنطلق و هحققت حلمي وأدخل معهد الموسيقي عشان أتعلم أكتر و أكتر.
و علي فكرة لما بفتكر زعل ماما مني لما قصرت في دراستي كنت بتضايق أوي، عشان دراستي هي أهم حاجة في حياتي و هي اللي هتوصلني لكل اللي أنا عايزاه
أسرع من ناس كتير حواليا.

نهلة مصطفي
مطربة مصر القادمة